Næstan ber að nefna Sigurð Bjarklind sem mestan heiður á skilinn af öllum stökkvurum á Íslandi fyrir framlag hans til fallhlífastökks og þróunar þess hér á landi. Sigurður bar þunga fallhlífastökkskennslu á Íslandi í hartnær 20 ár!

Frá æfingu Flugbjörgunarsveitarinnar á Helluflugvelli þann 7. september 2002 kl. 12:28. © Pétur Steinn

Árið 1983 komu til landsins fyrir tilstuðlan Flugbjörgunarsveitarinnar í Reykjavík 7 erlendir kennarar og var það í fyrsta skipti sem notaðar voru ferkantaðar aðalfallhlífar fyrir nemendur. 1984 komu 4 af þessum kennurum einnig á klakann og þá í boði Fallhlífaklúbbs Reykjavíkur. Má segja að upp frá því hafi fallhlífastökksmenning á Íslandi fyrst farið á flug. Íslendingar fóru að sækja sér æ meiri reynslu erlendis, bæði í sportstökki sem og að sækja ýmis kennaranámskeið.

Fallhlífastökkskóli Íslands var stofnsettur árið 1985 og komu þá til landsins fyrstu ferköntuðu kennslufallhlífarnar í eigu Íslendinga. Þótti sumum þetta hið mesta bruðl þar sem kringlóttar fallhlífar væru fullgóðar fyrir "þessa nemendur" en þróuninni varð ekki snúið til baka og í dag er eingöngu notast við ferkanntaðar fallhlífar í kennslu. Einungis Flugbjörgunarsveitin notast við hringlaga fallhlífar, fyrir því eru góðar og gildar tæknilegar ástæður sem ekki verður farið út í hér.

Íslenskir fallhlífastökkvarar ganga um borð í Twin Otter Flugfélags Íslands (TF-JMC) þann 8. september 2001 kl. 15:38. © Pétur Steinn Á myndinni má sjá (f.v.): Villa, Bergstein, Laufey, Ísleif, Matta, Kjartan, Arnór Barkar, Rúnar, Davíð og svo Jóa um borð í vélinni. Samkomuhaldarinn Siggi Bald fylgist með.

Allt í allt hafa rúmlega 1.400 Íslendingar prófað fallhlífastökk frá upphafi og þar af hátt í 1.200 lært hjá FSSÍ.

Á Íslandi eru í dag starfræktir 2 fallhlífaklúbbar, Fallhlífaklúbbur Reykjavíkur (FKR) og Fallhlífaklúbbur Íslands (FKÍ). Fallhlífaklúbbur Akureyrar og Fallhlífaklúbbur Austurlands sem staðsettur er á Egilsstöðum hafa sofið friðsælum þyrnirósarsvefni undanfarin ár.

Um fallhlífastökk gilda að sjálfsögðu reglur eins og með alla aðra flugumferð og kemur það í hlut Fallhlífarsambands Íslands (FALLÍS) að hafa yfirumsjón með þeim málum. Hlutverk þess er að sjá til þess að viðhlítandi reglur séu til, þeim sé framfylgt og að stuðla að þróun í fallhlífastökki. FALLÍS má segja að sé einskonar "ríkisstjórn" fallhlífastökkvara eða regnhlífasamtök fallhlífaklúbba og meðlima þeirra, tengiliður fallhlífastökkvara við Flugmálstjórn og aðra aðila innan flugsins s.s. Flugmálafélag Íslands (FMÍ).

TF-FKR, Cessna 206 í eigu Fallhlífaklúbbs Reykjavíkur, á Sandskeiði sumarið 2002. Í horni myndarinnar má sjá Steinberg Arnarson (Ninna) við fallhlífarpökkun.

Fjöldi þeirra sem stökkva á ári hverju er þó mun hærri. Skv. heimildum frá Fallhlífastökkskóla Íslands skrá sig að meðaltali um 120 nemendur á námskeið á ári. Eins má nefna að í lok árs 2002 var tala þeirra sem hlotið hafa viðurkennd réttindi frá Fallhlífasambandi Íslands komin í 135 frá því skipulögð skráning og eftirlit hófst með iðkendum íþróttarinnar.

Stokkið er víðsvegar á landinu og er það þá yfirleitt veðrið sem ræður ferðinni eins og með flest annað er við kemur flugíþróttum almennt. Yfirlit helstu stökksvæða á Íslandi má finna á síðunni Stökksvæði hér á vefnum.

Hafir þú spurningar um fallhlífastökk mun ég svara öllum pósti eftir bestu getu en spurningar tengdum kennslu er best að beina til Fallhlífastökkskóla Íslands.